+ In nomine domini nostri Iesu Christi. Anno Dominice
Incarnationis eiusdem millesimo ducentesimo nonagesimo
octavo, regnante domino nostro Karolo secundo, Dei gratia
invictissimo rege Ierusalem Sicilie ducatus Apulie et principatus
Capue Provincie et Folqualcherii comite, regnorum
suorum anno quartodecimo ac dominante excellentissimo domino,
domino Philippo, filio dicti domini nostri regis, inclito
principe Tarentino principatus sui anno quarto, mense
martii duodecimo eiusdem undecime indictionis, apud Materam.
Nos Iohannes Saracenus Matere prothoiudex et Iohannoccarus,
principalis Matere iudex, Nicolaus puplicus
eiusdem terre notarius et testes subscripti licterati de eadem
terra ad hoc vocati specialiter et rogati, presenti puplico scripta
testificantes declaramus, quod cum inter religiosum virum
fratrem Arnaldum, fratrem domus Sancte Marie Theotonicorum
in Apulia, priorem procuratorem sindicum seu iconomum
eiusdem ecclesie et fratrum eiusdem ordinis prout per
procuratorem ipsius nobis constitit evidenter, actorem ex parte
una; et notarium Magnarium filium quondam Rogerii de
iudice Magnario de eadem terra Matere conventum ex altera
parte. Questiones contentiones et altercationes plurime verterentur
de bonis stabilibus mobilibus seseque moventibus,
que fuerunt in bonis et de bonis quondam Simeonis de Sire
Arturio de eadem terra, oblati predicte ecclesie. Et dictus frater
Arnaldus predictum notarium Magnarium pro parte dicte
ecclesie in regia curia coram magnifico viro domino
Ermengario de Sabrano, Ariani comite, regni Sicilie magistro
iustitie et iudicibus eiusdem magne regie curie traxisset
in causam; asserens dictum notarium Magnarium occupasse
et cepisse seu ad eum pervenisse aliqua bona stabilia et mobiìia
que dicebantur fuisse Simeonis predicti ac super hoc
processum [ ... ]sset usque ad testium receptionem, tandem
amicorum interveniente tractatu ambarum partium zelantium
comodum et honorem ad subscriptum finem, concordiam,
transactionem seu pactionem insimul devenerunt, videlicet:
quod dictus frater Arnaldus pro parte ipsius ecclesie et fratrum
seu conventus eiusdem ecclesie, stante cum eo advocato
in hoc causa ecclesiastice dignitatis Francisco Sire Iohannis
Stephani concivi nostro per guadiam et stipulationem sollempnem
remisit eidem notario Magnario, tam predictam questionem
contra eum motam, quam omnes alias quas de cetero
ipse vel alius pro parte predicte ecclesie contra eundem notarium
Magnarium quocumque advenienti tempore possent
intentare vel exercere in iudicio vel extra iudicium, de iure
vel de facto seu quomodocumque ipsumque per acceptilationem
de predictis omnibus liberavit et quietavit. Et dictus notarius
Magnarius per guadiam et stipulationem sollempnem
obligavit se voluntarie in manibus dicti fratris Arnaldi
recipientis, nomine et pro parte dicte ecclesie, dare et solvere
eidem fratri Arnaldo vel cuilibet alii nuntio seu procuratori
predicte ecclesie et predictorum fratrum in cuius manu
hoc instrumentum sanum apparuerit, unciam auri unam ponderis
generalis per totum mensem octuber primo futuro, duodecime
indictionis pro predicta concordia, sub pena dupli.
Nec non et dictus notarius Magnarius per eandem guadiam
remisit et relaxavit eidem fratri Arnaldo, recipienti nomine
et pro parte predicte ecclesie et predictorum fratrum, omne
ius, actionem seu questionem quam vel quas posset movere,
intentare vel exercere contra predictam ecclesiam fratres seu
conventum eiusdem ecclesie pro predictis bonis predicti quondam
Simeonis seu occasione predictorum bonorum, in iudicio
vel extra iudicium, de iure vel de facto seu [ ... ] et signa
instrumenta apparuerint de quacumque concordia, pacto seu
transactione habitis inter predictum notarium Magnarium et
fratres seu conventum predicte ecclesie habeantur pro irritis
et inanibus et nulla vis seu probatione eisdem instrumentis
in iudicio vel extra iudicium possit assumi, ipsumque
fratrem Arnaldum pro parte predicte ecclesie, fratrum et conventus
eiusdem ecclesie per acceptilationem a predictis omnibus
liberavit et quietavit. Et obligaverunt se alter alteri cum
predicta sollempnitate ad penam unciarum auri sex solvendam
parti observanti predictam a parte que contra predictam
venerint vel aliquod predictorum, etiam in parte minuere
vel totaliter annullare conatus fuerit in iudicio vel extra iudicium,
de iure vel de facto seu quomodocumque et totidem
regie seu principali curie me predicto notario puplico penam
ipsam ab eis pro parte regie seu principalis curie sollempniter
stipulante; se ipsis proinde fideiussoribus constituerunt.
Que pena quotiens commissa fuerit totiens exigatur et exolvatur
et ea soluta vel non nichilominus prescripta et infrascripta
rata et illibata persistant et nichilominus teneantur
alter alteri ad omnes expensas dampna et interesse quas vel
que eos subire vel pati contingerint occasione molestie seu
contradictionis facte contra presentem obligationem et remissionem,
de quibus omnibus expensis dampnis et interesse
stabitur et credatur sacramento procuratoris predictorum
fratrum et ecclesie vel sacramento eiusdem notarii Magnarii
vel procuratoris ipsius, nulla alia extrinseca probatione quesita,
nonobstante lege vel consuetudine que in instrumentis
conventionalibus penas apponi prohibet et appositas exigi
non permictit, prefata licentia tam a predicto fratre Arnaldo
pro parte predicte ecclesie et predictorum fratrum, quam
a predicto notario Magnario pignorandi eos et eorum
successores vel heredes per omnia bona ipsorum pignora licita
et illicita, iure vetita seu permissa ubicumque ipsa inventa
fuerint, non expectato decreto iudicum seu iussu
cuiuslibet magistratus, donec predicta omnia compleantur et
observentur, prout presens continet instrumentum. Renuntians
a predictis partibus cum predicta sollempnitate beneficio
restitutionis in integrum, beneficio iuris canonici, civilis
et longobardi, beneficio constitutionum imperialium et regalium
et omni alii iuri scripto et non scripto, auxilio seu
beneficio propter quod possent venire contra predicta vel aliquod
predictorum et ea in parte minuere vel totaliter annulare.
Unde ad futuram memoriam et utriusque partis cautelam
de premissis omnibus coram nobis sicut predicitur sollempniter
actis, facta sunt duo puplica consimilia instrumenta,
unum videlicet habendum per predictum fratrem Arnaldum
pro cautela predicte ecclesie et aliud per predictum notarium
Magnarium pro sua suorumque heredum perpetua cauptione.
Scripta per manus mei predicti Nicolai puplici Matere
notarii, qui predictis interfui et meo solito signo signavi, subscriptionibus
nostrum predictorum iudicum et subscriptorum
testium subscriptionibus roborata.
